ఏఐ సాంకేతికతతో సృజనాత్మకతకు కొత్త దారులు.
‘అనుకోని పరిచయం’ షార్ట్ ఫిల్మ్‌ను ఆవిష్కరించిన మంథని ప్రెస్ క్లబ్ అధ్యక్షుడు అంకరి కుమార్.
అర్జున్ సమాచారం // అక్టోబర్ 14 // మంథని రిపోర్టర్:
యువత తమలోని సృజనాత్మకతను వెలికితీస్తూ, ఆధునిక సాంకేతిక పరిజ్ఞానాన్ని సద్వినియోగం చేసుకొని వివిధ రంగాల్లో రాణించాలని మంథని ప్రెస్ క్లబ్ అధ్యక్షుడు అంకరి కుమార్ పిలుపునిచ్చారు. మంథని ప్రెస్ క్లబ్‌లో మంగళవారం మంథని ప్రాంతానికి చెందిన ప్రాయకరావు సతీష్ కుమార్ అలియాస్ చిన్న రూపొందించిన ‘అనుకోని పరిచయం’ ఏఐ షార్ట్ ఫిల్మ్‌ను ఆయన ఆవిష్కరించారు.
ఈ సందర్భంగా అంకరి కుమార్ మాట్లాడుతూ.. ఆర్టిఫిషియల్ ఇంటెలిజెన్స్ (ఏఐ) వంటి ఆధునిక సాంకేతిక పరిజ్ఞానం సృజనాత్మక రంగంలో కొత్త అవకాశాలను అందిస్తోందని తెలిపారు. కథలు, చిత్రాలు, వీడియోలు వంటి విభిన్న రూపాల్లో తమ ఆలోచనలకు సాంకేతికతను జోడించి కొత్త ప్రయోగాలు చేయవచ్చన్నారు. యువత తమ అభిరుచికి అనుగుణంగా నైపుణ్యాలను పెంపొందించుకొని, వినూత్న ఆలోచనలతో ముందుకు సాగాలని సూచించారు.
మంథని ప్రాంతానికి చెందిన సతీష్ కుమార్ ఏఐ సాంకేతికతను ఉపయోగించి ‘అనుకోని పరిచయం’ అనే షార్ట్ ఫిల్మ్‌ను రూపొందించడం అభినందనీయమని ఆయన పేర్కొన్నారు. స్థానిక యువతలో ఉన్న ప్రతిభకు ఇటువంటి సృజనాత్మక ప్రయత్నాలు నిదర్శనమని అన్నారు. యువత తమ ఆలోచనలకు కార్యరూపం ఇస్తూ కొత్త రంగాల్లో అవకాశాలను అందిపుచ్చుకోవాలని ఆకాంక్షించారు.
యువతలో దాగి ఉన్న ప్రతిభను గుర్తించి ప్రోత్సహించేందుకు మంథని ప్రెస్ క్లబ్ తరఫున ఎల్లప్పుడూ సహకారం అందిస్తామని అంకరి కుమార్ తెలిపారు. ఆధునిక సాంకేతికతను సృజనాత్మకంగా వినియోగించుకుంటూ స్థానిక యువత మరిన్ని వినూత్న కార్యక్రమాలతో ముందుకు రావాలని కోరారు.
ఈ కార్యక్రమంలో ప్రెస్ క్లబ్ ఉపాధ్యక్షుడు బర్ల సంపత్, ప్రధాన కార్యదర్శి పోతరాజు సమ్మయ్య, కోశాధికారి తగరం రాజు, సీనియర్ జర్నలిస్టులు కొమురోజు మారుతి, కొమురోజు చంద్రమోహన్, లక్కాకుల నాగరాజుతోపాటు పలువురు పాత్రికేయులు పాల్గొన్నారు.